– Eit utruleg spennande forskings- og utviklingsprosjekt. – Vår oppgåve er å utvikle og produsere sikre og rimelege forankringssystem, seier salssjef Øyvind Ryste ved Rolls-Royce i Brattvåg på Sunnmøre til Nett.no. Sintef-testing Han seier at det framleis er streng konfidensialitet rundt prosjektet, men litt kan han likevel seie. – Vi ser blant anna for oss tre forankringspunkt, og vi har starta testing ved Sintef i Trondheim. – Vi har god tru på at dette kan verte stort for vår bedrift. Rolls-Royce i Brattvåg har i stor grad levert utstyr til olje- og offshoreindustrien. Etter eit par tunge år, har bedrifta fått eit løft gjennom bestilling av ei rekkje forankringssystem til riggar. Ser også på havoppdrett Men plassjef Charles Kvalvik seier at det også er viktig at bedrifta no ser seg om etter produkt i andre næringar. – I tillegg til forankring av flytande vindturbinar, ser vi på oppdrett som interessant for oss. – Oppdrettsanlegga vert stadig større, og vert også flytta lengre til havs. Då trengst det solid forankring. Der kjem vi inn. Kvalvik seier at bedrifta sin unike kompetanse på forankringsløysingar kan brukast innanfor ei rekke felt. – Ja, vi ser på fleire ulike område, men det er på offshore vind og offshore oppdrett vi trur mulegheitene er størst. Viktig omstilling Rolls-Royce i Brattvåg samarbeider tett med I. P. Huse på Harøya om utvikling og produksjon av forankringssysten. Dagleg leiar Morten Hopland seier at det er viktig å omstille seg ved å tilby produkt utanfor olje- og offshoreindustrien. – Vi har som mål om at desse bedriftene skal vere liv laga i mange tiår framover, så då må vi også vere i forkant med utviklinga. Han seier at teknologien kan brukast på mange område. – Vi har løysingane til alt som flyt og som må forankrast.